குடலா..? கடலா?

                                             

குடலை உருவி மாலையா போட்டுடுவேன்னு அடிக்கடி சொல்லக் கேட்டிருக்கிறோம். குடல் என்ன பூவா? கட்டி மாலையாகப் போடன்னு நெனச்சதுண்டு. ஆனா குடலைப் பூப்போல பார்த்துக் கொள்வது மிகவும் முக்கியம் என்பது சில் நோய்களைப் பற்றித் தெரிந்து கொள்ளும் போது புரிகிறது. குடலுக்கு வருகின்ற நோய்களுள் ஒன்று இந்தக் கிரோன் நோய். 

கிரோன் நோயைப் பற்றி சொல்ல வேண்டுமானால் நம் உடலின் நோய் எதிர்ப்பு மண்டலம் உணவுப்பாதையைத் தாக்கி அதில் சிறு வீக்கத்தைத் தோற்றுவிக்கிறது. கிரோன் நோயானது, அதிக அளவில் சிறுகுடல் மற்றும் குடல் கார்சினோமா ஆகியவற்றுடன் தொடர்புடையது, இதில் மலக்குடல் புற்றுநோயும் அடங்கும் அதுவே கிரோன் எனப்படும். வாய் முதல் மலவாய் வரையுள்ள செரிமான மண்டலத்தின் எந்த பகுதியையும் இந்த நோயானது தாக்கக்கூடும். இரைப்பை குடல் பாதை நோயின் தன்மை ஆகியவற்றின் காரணமாகவும், திசு ஊடுருவலின் ஆழம் காரணமாகவும், ஆரம்பநிலை அறிகுறிகள் மிகவும் தெளிவற்றத்தாகவும், புண்சார்ந்த பெருங்குடலழற்சி என்றும் கருதப்படுகிறது. கிரோன் நோய் கொண்டவர்கள், பெரும்பாலும் 

திடீரென நோய் தீவிரம் அடையும் நிலையை எதிர்கொள்ள நேரிடுகிறது.

கிரோன் நோய் மரபு சார்ந்தது. முன்னோர்களில் எவருக்கேனும் இந்நோய் இருப்பின் ஒருவருக்கு வரலாம். அதே சமயம் சுற்றுச்சுழலே பெருமளவில் இந்நோய்க்குக் காரணமாக இருக்கும் என்பதும் நாம் அறிய வேண்டுவது. ஏனெனில் தொழில்த்துறையில் முன்னேறிய நாடுகளில் இந்நோய் அதிகம் இடம்பிடிப்பதாக ஆய்வு முடிவுகள் கூறுகின்றன. புகை பிடிப்பவர்களுக்கு இந்நோய் வருவதற்கான காரணங்கள் மூன்று மடங்கு அதிகம் என்றும் கண்டறியப்பட்டுள்ளது. இளைஞர்களுக்கு அதிலும் 18 வயது முதல் 30 வயதுடையவர்கள் அதிகமாக இந்நோயால் பாதிக்கப்படுகிறார்கள்.

 வட அமெரிக்காவில் மட்டும் 400,000 முதல் 600,000 வரையிலான மக்களுக்குக் கிரோன் நோய் தாக்கம் காணப்படுகிறது. வடக்கு ஐரோப்பாவில், ஒவ்வொரு 1,00,000 மக்களுக்கும் 27-48 நபர்கள் இருப்பதாக நோய்ப்பரவல் பகுதி கணக்கீடுகள் தெரிவிக்கின்றன. கிரோன் நோயானது, இளைஞர்களுக்கு பால் வேறுபாடின்றி ஆண்கள் பெண்கள் இருவருக்கும் வருகிறது. ஆனாலும், நோய் எந்த வயதினருக்கும் ஏற்பட வாய்ப்புள்ளது என்று கூறும் ஐம்பது முதல் எழுபது வயதிற்கு இடைப்பட்டவர்களுக்கும் இதே அளவு இந்நோய் தாக்குகிறது என்கிறன ஆய்வுகள்.

அறிகுறிகள்

இந்த நோய்க்கு இதுதான் அறிகுறி என்று சுட்டிக்காட்ட இயலாது. கிரோன் நோயின் ஆரம்பநிலை அறிகுறியாக அடிவயிற்று வலி காணப்படுகிறது. இதில் தொடக்கத்தில் பேதி ஏற்படக்கூடும், குறிப்பாக இந்த பகுதியில் முன்னதாக அறுவைசிகிச்சை செய்து கொண்டவர்களுக்கு. பேதியில் இரத்தமும் கலந்திருக்கக்கூடும். ஒரு அறுவை சிகிச்சை அல்லது பல அறுவைசிகிச்சைகளை செய்து கொண்ட நபர்கள் பொதுவாக இரைப்பை குடல் பாதையில் குறுகிய குடல் நோய்க்குறியீட்டுக்கு ஆளாவர்கள். இதில் அமைந்துள்ள சிறுகுடல் அல்லது பெருங்குடல் பகுதியைச் சார்ந்தே கிரோன் நோயில் ஏற்படும், இரைப்பை குடல் பாதைக்கு வெளியேயும் பாதிப்புகளை ஏற்படுத்தக்கூடும், அதாவது தோல் தடித்தல், ஆர்த்ரிடிஸ் மற்றும் கண்களில் அழற்சி ஏற்படுதல் போன்ற ஏராளமான நோய் அறிகுறிகளைக் கொண்டது இது.

குதத்துவாரம் அருகில் அரிப்பு அல்லது வலி வீக்கம் அல்லது வெடித்து காணப்படுவது போன்றவைகளும் அழற்சியின் அறிகுறிகளாக இருக்கக்கூடும்.

குழந்தைகளுக்குப் போதிய வளர்ச்சியின்மை மற்றுமொரு அறிகுறியாகும். கிரோன் நோயைக் கொண்டுள்ள 30% குழந்தைகள் தடையுற்ற வளர்ச்சியைக் கொண்டுள்ளனர் என்று ஆய்வறிக்கைக் கூறுகிறது.

கிரோன் நோயாளிகள் உணவு உண்ணாமல் இருக்கும்போது நன்றாக உணர்வார்கள், இதனால் வழக்கமான உணவூட்டம் குறைவுறும். பசியின்மை, எடையிழப்பு ஆகியவை ஏற்படும்.

இரைப்பை குடல் பாதிப்புடன், கிரோன் நோயானது, பிற உறுப்பு மண்டலங்களையும் பாதிக்கக்கூடும். கண்ணின் உட்பகுதியில் யுவெய்டிஸ் எனப்படும் அழற்சி ஏற்படுதல், கண் வலியை ஏற்படுத்தும், குறிப்பாக அதிக ஒளிக்கு ஆளாகும் போது (ஃபோட்டோபோபியா). கண்ணின் வெள்ளைப் பகுதியிலும் அழற்சி தோன்றக்கூடும் (ஸ்கெலெரா), இந்நிலைக்கு எபிஸ்கெலரிடிஸ் என்று பெயர். எபிஸ்கெலரிடிஸ் மற்றும் யூவெடிஸ் ஆகிய இரண்டுமே சிகிச்சை இன்றி தொடர்ந்தால் கண் பார்வை இழப்பை ஏற்படுத்தக்கூடும்

கிரோன் நோயில் பெரியனல் தோல் குறிகளும் பொதுவாக காணப்படக்கூடும். மலம் கழித்தல் கட்டுப்படுத்தமுடியாமையும் பெரி-ஆனல் கிரோன் நோயில் காணப்படக்கூடும். இரைப்பை குடல் குழாயின் எதிர் எல்லையில் உள்ள, வாயும் கூட குணப்படுத்த முடியாத புண்களால் பாதிக்கப்படலாம். அரிதாக, எஸோபாகஸ், மற்றும் வயிறு ஆகியவையும் கிரோன் நோயில் பாதிப்படையக்கூடும். இவை விழுங்குவதில் கடினம் (dysphagia), மேல் வயிற்று வலி மற்றும் வாந்தி ஆகியவற்றைத் தோறறுவிக்கிறது.,

கிரோன் நோயில் தோல், ரத்தம் மற்றும் எண்டோகிரைன் அமைப்பு ஆகியவை அடங்கக்கூடும். தோல் பாதிப்பில் ஒரு வகை எரிதிமா நோடோசம் என்பதாகும், சிவப்பு நிற கட்டிகள் தோலில் ஏற்படுவதை எரிதிமா நோடோசம் என்பர்.  இது. சப்கியூட்டானஸ் திசுக்களில் ஏற்படும் அழற்சியின் காரணமாக ஏற்படுகிறது.

மற்றும் அது செப்டல் பன்னிகியூலிட்டிஸ் ஆல் வகைப்படுத்தப்படுகிறது. மற்றொரு தோல் நோயானது, பயோடெர்மா காங்க்ரேனோசம் என்பதாகும் இது மிகவும் வலியுள்ள புண்ணைத் தோற்றுவிக்கும். இரத்தம் உறைவடையும் விதத்தையும் கிரோன் நோய் அதிகரிக்கிறது; காலின் அடிப்பகுதியில் வலிமிகுந்த வீக்கம் காணப்படும்

நுரையீரல் எம்பாலிசம் காரணமாக சுவாசப்பற்றாக்குறையும் ஏற்படக்கூடும். கிரோன் நோயானது, நரம்பு தொடர்பான சிக்கல்களையும் உருவாக்கக்கூடும். பொதுவாகக் காய்ச்சல் காணப்படும்,

கிரோன் நோய் ரூமட்டாலாஜிக் நோயுடனும் தொடர்புடையது. ஆதால் இதனால் முழங்கால் முட்டி, தோள் பட்டை, முதுகெலும்பு, ஆகியவை பாதிக்கப்படும். வலி, வீக்கம், முட்டி மடக்க முடியாமல் போவது ஆகிய இவையும் இந்நோயின் அறிகுறிகளுள் அடங்கும்.

ஆழமான இரத்த அடைப்பு காரணமாக இது ஏற்படும், அதே நேரத்தில். நோய் எதிர்ப்பு மண்டலம் இரத்த சிவப்பு அணுக்களைத் தாக்கத் தொடங்கும், சுயநோயெதிர்ப்பு ஹீமோலிட்டிக் அனீமியா, என்ற நிலை தோன்றக்கூடும், இதனால் மயக்கம், தோல் நிற மாற்றம் மற்றும் இரத்த சோகையில் பொதுவான பிற அறிகுறிகளும் தோன்றக்கூடும். விரல்களின் நுனியில் வடிவ மாற்றம் ஏற்படும் கிளப்பிங் என்பதும், கிரோன் நோயில் தோன்றக்கூடும். இறுதியாக, கிரோன் நோயானது, ஆஸ்டியோபோரோசிஸ் அல்லது எலும்பு மெலிவடைதலை தோற்றுவிக்கக்கூடும். ஆஸ்டியோபோரோசிஸைக் கொண்ட நபர்களுக்கு எலும்பு உடைவதற்கான வாய்ப்புகளும் அதிகம்

கிரோன் நோயானது, நரம்பு தொடர்பான சிக்கல்களையும் உருவாக்கக்கூடும் 15% நோயாளிகள் வரை இந்த பாதிப்பு காணப்படுகிறது இதில் பொதுவானவை தசைபிடிப்புகள், வாதம், பரிவு தண்டுவட நியூரோபதி, தலைவலி மற்றும் மனச்சோர்வு ஆகியவை ஆகும்

கண்டறியும் முறை

கிரோன் நோயைக் கண்டறிவது சில நேரங்களில் மிகவும் சவாலானதாக இருக்கக்கூடும், இந்நோயைக் கண்டறிவதற்கு உதவ பல சோதனைகள் பெரும்பாலும் அவசியமாகிறது. முழுமையான சோதனைகளும், கிரோன் நோய் இருப்பதை முழு தெளிவுடன் உறுதிப்படுத்துவதில்லை; ஒரு கோலன்ஸ்கோப்பி ஏறத்தாழ 70% திறனுள்ளதாக இருக்கிறது, பிற சோதனைகள் இதைவிடவும் குறைவான திறனையே கொண்டுள்ளன. சிறுகுடலில் உள்ள நோய் குறிப்பாக அதிக கடினமானது, ஏனெனில் பாரம்பரியமான கோலனஸ்கோப்பி பெருங்குடல் மற்றும் சிறுகுடலின் அடிப்பகுதிகள் ஆகியவற்றை மட்டுமே எட்டுமாறு அமைக்கப்பட்டுள்ளது. எண்டோஸ்கோப்பிக் கண்டறிதலில் கேப்ஸ்யூல் எண்டோஸ்கோப்பி அறிமுகப் படுத்தப்பட்டது உதவிகரமாக தற்போது இருந்து வருகிறது.

எண்டோஸ்கோபி

கிரோன் நோயைக் கண்டறிவதற்கு கோலனஸ்கோபி என்பது சிறந்த சோதனையாக இருக்கிறது, ஏனெனில் இது நேரடியாக பெருங்குடல் மற்றும் இறுதிப்பகுதி இலியம் ஆகியவற்றின் காட்சியைக் காண்பிக்கிறது, மேலும் நோய் வளர்ச்சியின் வடிவமைப்பைக் கண்டறிய முடிகிறது. சில நேரங்களில், கோலனஸ்கோப் இறுதிப்பகுதி இலியத்தையும் தாண்டி செல்லக்கூடும், இது ஒவ்வொரு நோயாளிக்கும் வேறுபடுவதாக காணப்படுகிறது. இந்த நடைமுறையின்போது, பயாப்ஸியையும், இரைப்பை குடல் மருத்துவர் செய்யமுடியும், அதாவது சிறிய மாதிரிகளை ஆய்வக சோதனைக்காக எடுப்பது, இது நோய் கண்டறிதலுக்கு உதவக்கூடும். 30% கிரோன் நோயானது, இலியத்தில் மட்டுமே பாதிப்பை ஏற்படுத்துகிறது, ஆனாலும் இலியத்தின் இறுதிப்பகுதியில் குழாய் மூலம் பார்த்தல் நோய் கண்டறிதலுக்கு மிகவும் அவசியம்.

கதிரியக்க சோதனைகள்

சிறுகுடல் பின் தொடருதலானது, கிரோன் நோயை சுட்டிக்காட்டக்கூடும் மற்றும் நோய் சிறுகுடலில் மட்டுமே இருக்கும்போது இது பயனுள்ளதாக இருக்கும். ஏனெனில், கோலனஸ்கோப்பி மற்றும் கேஸ்ட்ரோஸ்கோபி ஆகியவை இறுதிபகுதி இலியம் மற்றும் டியோடினத்தின் ஆரம்பப்பகுதி ஆகியவற்றின் நேரடி விஷுவலைசேஷனை மட்டுமே அனுமதிக்கிறது, அவற்றைப் பயன்படுத்தி சிறுகுடலின் பிற பகுதிகளை மதிப்பிட முடியாது. இதனால், பேரியம் பின் தொடருதல் எக்ஸ் கதிர் பயன்படுத்தப்படுகிறது. இதில் பேரியம் சல்ஃபேட் உட்செலுத்தப்படுகிறது மற்றும் ஃப்ளூரோஸ்கோபிக் குடல் படங்கள் எடுக்கப்படுகின்றன. இவை சிறு குடலில் அழற்சி மற்றும் சுருக்கம் ஏற்பட்டுள்ளதா என்று காண்பதற்கு உதவக்கூடியது. பேரியம் எனிமாஸ் என்ற சோதனையில் பேரியமானது மலக்குடலில் உட்செலுத்தப்பட்டு, ஃப்ளூரோஸ்கோப்பி மூலம் குடல் படமெடுக்கப்படுகிறது, கோலனஸ்கோப்பியின் பரவலான பயன்பாட்டின் காரணமாக கிரோன் நோயின் கண்டறிதலில் அரிதாகவே பயன்படுத்தப்படுகிறது. கோலனஸ்கோப்பானது நுழைய முடியாத சிறிய துளைகளில், அமைப்பு ரீதியான மாறுபாடுகளை கண்டறிவதற்கு அவை இன்னமும் பயனுள்ளதாகவே இருக்கின்றன அல்லது பெருங்குடல் நீட்சி தோற்றத்தைக் கண்டறிய பயன்படுகின்றன.

சிடி மற்றும் எம்ஆர்ஐ ஸ்கேன்கள் சிறுகுடல் என்டரோக்லைஸில் நெறிமுறைகளை அளவிட பயன்படுகின்றன. கிரோன் நோய்களின் சிக்கல்களான சீழ் கோர்த்தல்கள், சிறுகுடல் தடை அல்லது நீட்சி உருவாக்கம் போன்றவற்றை கண்டறியவும் இவை கூடுதலாக பயன்படுகின்றன. காந்த ஒத்திசைவு படமெடுத்தல் (MRI) என்பது சிறு குடலை படமெடுப்பதற்கு மற்றும் பிற சிக்கல்களைக் கண்டறிவதற்கான மற்றொரு விருப்பமாகும், இது மிகவும் விலையுள்ளது மற்றும் எல்லா இடங்களிலும் கிடைக்காது என்றாலும் விரும்பக்கூடிய ஒன்றாகவே இருக்கிறது

இரத்தப் பரிசோதனைகள்

முழுமையான இரத்த எண்ணிக்கை இரத்த சோகையைச் சுட்டிக்காட்டக்கூடும், இவை இரத்த இழப்பு அல்லது உயிர்ச்சத்துக் குறைபாடு ஆகியவற்றின் காரணமாக ஏற்படக்கூடும். இரண்டாவதாக கூறப்பட்டது, இலியிட்டஸில் காணப்படும் ஏனெனில், விட்டமின் பி ஆனது இலியத்தில் உள்ளே இழுக்கப்படுகிறது. எரித்ரோசைட் படிவடைதல் வீதம் அல்லது ESR மற்றும் சி ரியாக்டிவ் புரதம் அளவீடுகள் ஆகியவையும் அழற்சியின் அளவை அளவிடுவதற்கு மிகவும் பயனுள்ளவையாக இருக்கக்கூடும். இந்த சிக்கலின் காரணமாக நோயாளிக்கு இலிக்டோமி செய்யப்படுகிறது.. இரத்தசோகை ஏற்படுவதற்கான மற்றொரு காரணம் தொடர் நோயாகும், இது மைக்ரோசைடிக் மற்றும் ஹைப்போகிரோனிக் இரத்த சோகை என்று வகைப்படுத்தப்படுகிறது. இரத்தசோகை ஏற்படுவதற்கு பலவகையான காரணங்கள் இருக்கக்கூடும், அசதியோபெரின் போன்ற குடல் அழற்சி நோய்களுக்கு சிகிச்சை அளிக்கப் பயன்படும் மருந்துகள், சைடோபினியா மற்றும் சல்ஃபாசலாசைன் போன்றவற்றைத் தோற்றுவிக்கும், அது தவறாக உள்ளிழுக்கப்படுவதை விளைவிக்கும். சாக்காரோமைசிஸ் செரிவிசியே ஆன்டிபாடிகள் (ASCA) மற்றும் நியூட்ரோபில் சைடோபிளாஸ்மிக் எதிர்ப்பு ஆன்டிபாடிகள் (ANCA) ஆகியவற்றுக்கான சோதனைகள் குடலின் அழற்சி நோய்களைக் கண்டறிவதற்கு பயன்படுகின்றன மற்றும் இவையே கிரோன் நோயை பிற அல்சரேட்டிவ் கொலிட்டஸ் நோயிலிருந்து வேறுபடுத்தி அறியவும் உதவுகிறது. மேலும், ASCA போன்ற சீரோலாஜிக்கல் ஆன்டிபாடிகளின் அளவு அதிகரித்தல், லாமினாரிபயோசைட் எதிர்ப்பு பொருட்கள் சிட்டோபயோசிட் எதிர்ப்பு மான்னோபயோசிட் எதிர்ப்பு லாமினாரின் எதிர்ப்பு மற்றும் சிட்டின் எதிர்ப்பு ஆகியவை தொடர்புடைய நோய்க்கூறுகளாகும் மற்றும், இவை கிரோன் நோய் முன் கண்டறிதலுக்கு உதவக்கூடும்.

கிரோனின் பெயர்க்காரணம்:

குடல் அலற்சி நோய்க்கு குரோனின் எனப் பெயர் வரக்காரணம் அமெரிக்க, இரைப்பை குடலியக்க மருத்துவர் பர்ரில் பெர்னார்டு கிரோன் என்பவரின் பெயரில் இந்நோய்க்கு பெயரிடப்பட்டுளது. இவர் 1932 -ஆம் ஆண்டில் தொடர்ச்சியாக நோயாளிகளுக்கு குடலின் முடிவுப்பாதிப்பு பாதிப்பதை விவரித்தார், இது பாதிக்கும் உணவு குடல் பாதையின் இடத்தைப் பொறுத்தும் இது வகைப்படுத்தப்படுகிறது. இல்லியோகோலிக் கிரோன் நோய் என்பது இலியம் பகுதியையும் (சிறுகுடல் பகுதியின் இறுதி, இது பெருங்குடல் உடன் இணைப்பது) பெருங்குடலையும் பாதிக்கிறது, ஐம்பது சதவீதம் நோயாளிகள் இதனாலேயே பாதிக்கப்படுகின்றனர். இந்த கிரோன் இலிட்டிஸ் என்பது இலியம் பகுதியை மட்டுமே பாதிக்கிறது. கிரோன் கொலிட்டிஸ் என்பது பெருங்குடலை பாதிக்கக்கூடியதாகும், இந்த காரணத்திற்காகவே, நோயானது, பகுதிவாரி இலியட்டிஸ் அல்லது பகுதிவாரி என்டெரிடிஸ் என்று அழைக்கப்படுகிறது.

கிரோனின் வகைகள்:

குறுக்கக்கூடியது, ஊடுருவக்கூடியது மற்றும் அழற்சி சார்ந்தது என்று கிரோன் நோயில் மூன்று வகைகள் பொதுவாக காணப்படுகின்றன:

'குறுக்கக்கூடியது' குடலின் அகலத்தைக் குறைக்கும், இதனால், குடல் அடைப்பு அல்லது மலம் கழித்தலில் சிரமம் போன்றவை ஏற்படக்கூடும்.

'ஊடுருவல் நோய்' குடல் மற்றும் தோல் போன்ற உடலின் பிற பகுதிகளுக்கு இடையே வழக்கத்திற்கு மாறான பாதைகளை (ஃபிஸ்டியுல்லா) உருவாக்குகிறது.

'அழற்சி சார்ந்த' நோயில் குறுக்கம் அல்லது ஃபிஸ்டியுல்லா ஆகியவை தோன்றாமல் அழற்சி ஏற்படுகிறது. இந்நோய்கள் அனைத்தும் எண்டோஸ்கோபி செய்வதாலே தெளிவாக அறியமுடியும்.

மருந்துகள்

குரோன் நோயின் அறிகுறிகளுக்காக அளிக்கப்படும் மருந்துகளில், அமினோசாலிசிலிக் அமிலம் (5-ASA) மருந்துக்கலவைகள், ப்ரீடெனிசோன், நோயெதிர்ப்புதிறன் மாற்றிகளான அசாதியோபெரின், மெர்காப்டோப்யூரின், மெதோட்ர்க்ஸேட், இன்ஃப்ளக்சிமாப், அடாலிமுபாம்], செர்டோலிஜுமாப் மற்றும் நாட்லிஜுமாப் ஆகியவை அடங்கும். குரோன் நோயின் மிகத்தீவிர பாதிப்புகளின் போது மட்டுமே ஹைட்ரோகார்டிசோன் பயன்படுத்தப்பட வேண்டும்.

ஓபியேட் ஏற்பி ஆன்டாகானிஸ்ட்டான நால்ட்ரக்சோன் மருந்தின் குறைவான மருந்தளவுகள் (குறைந்த மருந்தளவு நால்ட்ரக்சோன் என்றும் அழைக்கப்படுகிறது) 67% நோயாளிகளுக்கு நோய் தணிப்பைத் தூண்டுவதற்கு உதவுவதாக கண்டறியப்பட்டுள்ளது, இதற்கான ஆய்வு பென்சில்வேனியா பல்கலைக்கழகத்தில் நடைபெற்றது. பென்சில்வேனியா மாகாண மருத்துவ பல்கலைக்கழக, இரைப்பை குடல் மருத்துவ பேராசிரியர் டாக்டர். ஜில் ஸ்மித், "கிரோன் நோயாளிகளிடையே LDN சிகிச்சையானது பயனுள்ளதாகவும் பாதுகாப்பானதாகவும் இருக்கிறது" என்கிறார். ஸ்மித் மற்றும் அவருடைய நண்பர்களும் இணைந்து NIH மானியத்தைப் பெற்று, இரண்டாம் கட்ட மருந்துப்போலி கட்டுப்படுத்தப்பட்ட மருத்துவ ஆய்வை நடத்தி வருகின்றனர்.

குடல் அழற்சி சார்ந்த நோய்களுக்குச் சிகிச்சையளிக்க அக்குபஞ்சர் பயன்படுத்தப்படுகிறது,

மீத்தோட்ரெக்ஸேட் என்பது ஒரு எதிர்ப்பு மருந்தாகும், இது கீமோதெரபியிலும் பயன்படுத்தப்படுகிறது. கார்டிகோஸ் டீராய்டுகளைத் தொடர்ந்து உட்கொள்ள முடியாத நபர்களுக்கு நோய் தணிப்பைத் தக்க வைக்க இது பயன்படுத்தப் படுகிறது

மெட்ரோனிடாசோல் மற்றும் சிப்ரோஃப்ளோக்சாசின் ஆகியவை கிரோன் நோய்க்கு அளிக்கப்படும் ஆன்டிபயோடிக்குகள் ஆகும், எப்படிப் பார்த்தாலும் எய்ட்ஸ் நோய் போலத்தான் கிரோன் நோயும். இந்நோயை முற்றிலும் சரியாக்கக் கூடிய மருந்துகளோ அல்லது அறுவைசிகிச்சை முறையோ இது வரை கண்டறியப்படவில்லை. மேற்கொள்ளப்படுகின்ற எல்லா சிகிச்சைகளும் அறிகுறிகளைக் கட்டுப்படுத்துவது, நோயின் நிலையை அதிகரிக்காமல் கட்டுக்குள் வைத்திருப்பது, மற்றும் நோய் முற்றி விடாமல் தடுப்பது ஆகியவற்றுடன் முடிந்து விடுகின்றது.

(இது டிசம்பர் 1-15, 2011 குமுதம் ஹெல்த் இதழில் இடம்பெற்ற என் கட்டுரை. நன்றி குமுதம் ஹெல்த்)

திரவ தங்கம்!

                ஆலிவ் எண்ணெய் கண்களுக்குக் குளிர்ச்சியும், சருமத்திற்கு வெண்மையும், தலைமயிர்க்கு போஷாக்கும் அளிக்கிறது என்பது பல நாட்களாக நாம் அறிந்த செய்தி... ஆனால் மார்பகப் புற்று நோய்க்கு மாமருந்து என்பது தற்போதைய ஆய்வு முடிவு.

                தூய்மையான ஆலிவ் எண்ணெயில் காணப்படும் பாலிஃபீனால், மார்பகப் புற்றுநோயை வராமல் தடுப்பதுடன், மார்பகப் புற்றுநோய் இருப்பவர்களுக்கு

                குணப்படுத்துவதற்கும் உதவுகிறது என்று கண்டறியப்பட்டுள்ளது. இந்த பாலிஃபீனால் மார்பகப் புற்றுநோய் செல்களை அழிக்கும் தன்மை கொண்டதாக உள்ளது என்றும் கண்டறியப்பட்டுள்ளது. இதனை ஸ்பெயின் நாட்டின் ஐசிஓ அமைப்பும், கிரனடா பல்கலைக்கழகமும் இணைந்து நடத்திய ஆய்வு முடிவு தெரிவித்துள்ளது.

                பாலிஃபீனால் என்னும் திரவப்பொருள் ஆலிவ் எண்ணெயில் இருந்து பிரித்து வடிகட்டி எடுக்கப்பட்டது, பின்னர் மீண்டும் அது திடப் பொருளாக்கப்பட்டது. அத்திடப்பொருளான பாலிஃபீனால் கொண்டு நடத்திய ஆய்வில், மார்பகப் புற்றுநோயைத் தடுக்கும் ஆற்றல் அதில் இருப்பது தெரிய வந்துள்ளது.

                எனவே மார்பகப் புற்றுநோய் வராமல் இருக்கவும், அந்நோய் உள்ளவர்கள் அதில் இருந்து நிவாரணம் பெறவும், ஆலிவ் எண்ணெயை உபயோகிக்கலாம் என்று அறிவித்துள்ளது..

                இதயத்துக்கு ஏற்ற சமையல் எண்ணெய் என்று இதனைச் சொல்கின்றனர். இதன் விலை என்ன அந்த அளவிலா உள்ளது என்னும் வினாவும் பலரிடம் உள்ளது. அது குறித்துச் சிந்திக்கும் முன்னர் புற்று நோய் வந்து சிகிச்சை எடுக்கும் செலவைக் குறித்துச் சிந்திக்க வேண்டி உள்ளது.. முக்கியமாக புற்று நோய் அறிகுறி உள்ளவர்கள், ஆரமப நிலை புற்று நோயாளிகள் ஆகியோர் ஆலிவ் எண்ணெயைப் பயன் படுத்தலாம்.

                எனெனில் இது கண்டிப்பாக மார்பக புற்றுநோயைத் தடுக்கும் என்றும் கூறுகின்றனர். பெண்கள் நாள்தோறும் உணவில் 10 மேசைக்கரண்டி வரை ஆலிவ் எண்ணெய் சேர்த்துக் கொண்டால், மார்பக புற்றுநோயை தடுக்கலாம் என்று பார்சிலோனா ஆராய்ச்சி முடிவு தெரிவிக்கிற்து.

                புற்றுநோயை உண்டாக்கும் ஜீன்களைத் தடுப்பதில் ஆலிவ் எண்ணெயின் பங்கு பற்றி பார்சிலோனாவின் ஆடனோமா பல்கலைக்கழக ஆராய்ச்சியாளர்கள் ஆய்வு நடத்தினர். முதலில் மனித உடலுக்கு பொருத்தமான உயிரினமான எலியிடம் ஆராய்ச்சி நடத்தப்படது. தினசரி ஆலிவ் எண்ணெய் சேர்த்த உணவை எலிகளுக்கு அளித்த வந்தனர். கொடுத்து வைத்த எலிகள். ஆலிவி உணவு அவற்றிற்கு.. அதில் பெண்களுக்கு மார்பக புற்றுநோயை ஏற்படுத்தக்கூடிய ஜீன்களை ஆலிவ் எண்ணெய் அழித்தொழிப்பது தெரிய வந்தது. மேலும், மரபணுவை சேதம் ஏற்படாமல் பாதுகாப்பதிலும்  பாலிஃபீனால் பெரும் பங்கு வகிப்பது கண்டுபிடிக்கப்பட்டது.

                இதன்மூலம், மரபணு பாதிப்பால் ஏற்படக்கூடிய மற்ற புற்றுநோய்களையும் ஆலி எண்ணெய் தடுக்கும் என்று நிபுணர்கள் தெரிவித்தனர். இதுபற்றி ஆராய்ச்சியாளர் எஜுர்ட் எஸ்ரிச் கூறுகையில், பெண்கள் தினசரி உணவில் 10 மிலி முதல்  50 மிலி ஆலிவ் எண்ணெய் பயன்படுத்தினால் மார்பகப் புற்றுநோயை தடுக்கலாம்" என்றார். உலக அளவில் பெண்களின் உயிர் பறிக்கும் நோயாக முதலிடத்தில் இருப்பது மார்பக புற்றுநோய். அதை கட்டுப்படுத்த ஆலிவ் எண்ணெய் உதவும் என்றார்

                ஸ்பெயின் நாட்டில் நடந்த மற்றொரு ஆராய்ச்சியில், ஆலிவ் எண்ணெய் பயன்படுத்தினால் புற்றுநோய் மட்டுமின்றி இதய நோய், ரத்த தமனி பாதிப்பு

                ஆகியவற்றையும் தவிர்க்கலாம் என்றார். இதயத்துக்கு ஏற்ற மிகச்சிறந்த எண்ணெய் என்றால் ஆலிவ் எண்ணெய்யைத்தான் (Oilve Oil) சொல்ல வேண்டும். உலக அளவில் மேலை நாடுகளில் இதயத்துக்கு ஏற்ற சிறந்த சமையல் எண்ணெய்யாக ஆலிவ் எண்ணெய்தான் கருதப்படுகிறது.

                இந்த எண்ணெய்யைச் சமையலுக்குப் பயன்படுத்தும் மேலை நாடுகளில் இதய நோய்களின் தாக்கம் மிகமிகக்குறைவாக இருப்பதாக பலவகையான ஆய்வு முடிவுகள் உறுதி செய்துள்ளன

                உணவு சாப்பிடுவதற்கு அரை மணி நேரத்திற்கு முன்னதாக தினசரி அரை டீஸ்பூன் ஆலிவ் எண்ணையைச் சாப்பிட்டு வந்தால், ரத்தக் குழாயில் கொழுப்பு படியாமல் தடுக்கலாம் என்கிறது மற்றொரு ஆய்வு..

                கனியின் நடுவில் கடினமான விதையும் சுற்றி திடமான சதைப் பகுதியும் இருக்கும். கனிகள் உருண்டை, நீளுருண்டை எனப் பலவடிவில் இருக்கும்.இதன் இலை மேற்புறம் கரும் பச்சை வண்ணத்திலும் அடிப்புறம் வெளிர் பச்சை நிறத்திலும் இருக்கும். காய் பச்சை நிறத்திலும், கனிந்த பின் பழுப்பு, சிவப்பு அல்லது கறுப்பு நிறத்திலுமிருக்கும். இலைகளில் எண்ணெய்ச் சத்து அதிகம். தவிர தாதுப் பொருள்களும், வைட்டமின் 'ஏ', வைட்டமின் 'சி', முதலான ஊட்டச்சத்துக்களும் அடங்கியுள்ளன. இவ்விதையில் இருந்து எடுக்கப்படும் எண்ணெய் 'திரவத்தங்கம்' என்று மருத்துவ உலகினரால் அழைக்கப்படுகிறது.

(இது பிப்ரவரி  1-15, 2012 குமுதம் ஹெல்த் இதழில் இடம்பெற்ற என் கட்டுரை. நன்றி குமுதம் ஹெல்த்)

அழகைக் குறைக்கும் சீரியல் அழுகை!

                பெண்கள் தாங்கள் நினைத்ததைச் சாதித்துக்கொள்ள பயன்படுத்தும் ஒரே ஆயுதம் இதுதான். உப்பு கரிக்கும் என்றாலும் பெண்கள் இந்த அஸ்திரத்தைப் பயன் படுத்தி விட்டார்கள் என்றால் எப்பேர்ப் பட்ட கொம்பனாக இருந்தாலும் தப்பிக்கவே முடியாது. கணவன் தும்மலில்  தொடங்கி வாங்கும் கம்மல் வரை அழுது அழுது சாதிக்கும் அருங்குணம் அவள் குணம். ஆம்

                உண்ணும் வேளையில் கணவன் தும்முகிறான். மனைவி தலையில் தட்டி வாழ்த்திய அதே வேகத்தில் அழத்தொடங்கி விடுகிறாள். “உம்மை நினைக்க வேண்டிய நான் இங்கிருக்க யார் உம்மை நினைக்கிறார்கள், தும்மல் வருகிறதே?”. என்று அழத்தொடங்கி விடுகிறாள். மறுநாள் அதே உண்ணும் வேளையில் மீண்டும் வந்து விடுகிறது அதே தும்மல் அவனுக்கு. நேற்றைய நிலை வந்த் விட்டால் என்ன செய்வது என்று அவனுக்கு அச்சம். அதனால் அவன் தும்மலை அடக்கிக் கொள்கிறான். அன்றும் அழத்தொடங்கிவிடுகிறாள் தலைவி. இன்று ஏன் அழுகிறாய் என்று அவன் கேட்க, “நிச்சயமாக உங்களுக்கு யாரோ ஒருத்தி உள்ளாள். அது எனக்குத் தெரியக் கூடாது என்றுதான் வந்த தும்மலை அடக்கிக் கொண்டீர்கள்” என்று கூறி அழுகிறாள். அது மட்டுமா? மறுநாள் தனக்குத் தும்மல் வருவது போல வந்து வராது நின்று விடுகிறது. அன்றும் அழுகை. ஏன் என்றால் அவன் தன்னை நினைப்பது போல நினைத்து நினைக்காது விட்டானோ” என்று அழுகையாம். திருவள்ளுவரின் தலைவி இப்படிப்பட்டவள். இப்போது அவள் ஏன் அழுதால்? எப்படி அழுதால் என்பதில்லை ஆய்வு. இப்படி தும்மலுக்கும் இருமலுக்கும் அழுகும் பெண்களை ஆண்களுக்குப் பிடிக்குமா? என்பதே இன்றைய ஆய்வு.

                கண்டிப்பா பிடிக்காதுங்க.. இது நமக்குத் தெரிந்ததுதானே. ஆனாலும் ஆய்வு செய்து சொன்னாத்தானே நாம் நம்புவோம். அடக்கருமமே.... இதையும் ஆய்வு செய்து சொல்லி இருக்கிறார்கள். எதற்கெடுத்தாலும் அழுது கொண்டிருக்கும் பெண்களை ஆண்களுக்கு பிடிக்காதாம். மேலும் அழுபவர்களின் அழகும் குறையுமாம். இது  சமீபத்திய ஆய்வொன்றின் மூலம் தெரிய வந்துள்ள முடிவு.

                பெண்கள் எப்பொழுதுமே அதிகளவு உணர்ச்சி வசப்படுவார்கள், ஏதாவது ஒரு சின்ன கஷ்டம் என்ற உடனே அழுது விடுவார்கள். தமது துயரம் மட்டுமல்லாமல் மற்றவர்களின் துன்பங்களை கேட்டாலும் அழுதுவிடுவர்.

                இந்நிலையில் இஸ்ரேலை சேர்ந்த ஆராய்ச்சியாளர்கள் இது தொடர்பான ஆய்வொன்றை மேற்கொண்டனர். இதில் ஆண்களும், பெண்களும் பங்கேற்றனர். அவர்களில் பெண்களை மட்டும் தனிக்குழுவாகப் பிரித்து பரிசோதனை செய்தனர். அந்த குழுவின் மொத்தம் 60 பெண்கள் இருந்தனர்.

                பெண்கள் அமர்ந்திருந்த தனி அறையில் மிகவும் மோசமான அழுகை காட்சிகள் கொண்ட திரைப்படம் திரையிடப்பட்டது. சுமார் அரைமணிநேரம் படம் ஓடியது. இதனால் பெண்களுக்கு கண்களில் கண்ணீர் வழியத் தொடங்கியது. அப்போது அறைக்குள் நுழைந்த ஆராய்ச்சியாளர்கள் படம்பார்த்து கண்ணீர் வடித்த பெண்களின் கண்ணீரை சோதனைக் குழாய்களில் சேகரித்தனர். கண்ணீர் வராத பெண்களுக்காக மற்றொரு சோதனைக் குழாயில் உப்பு கலந்த நீரை தயார் செய்தனர்.

                பின்னர் கண்ணீர் வடிந்த பெண்களின் முகத்தில் உண்மையான கண்ணீரையும், கண்ணீர் வராத பெண்களின் முகத்தில் உப்புநீரையும் பேசியல் செய்வது போல் பூசினர். இப்போது யாருக்கு உண்மையான கண்ணீர், யாருக்கு பொய்யான கண்ணீர் என்பது ஆய்வாளர்களைத் தவிர மற்றவர்களுக்கு தெரியவில்லை.

                இந்நிலையில் வெளியே இருந்த ஆண்கள் சிலரை உள்ளே அழைத்து அந்த பெண்களின் அருகில் சென்று பேசச் செய்தார்கள். அப்போது ஆண்களின் முகத்தில் ஏற்படும் மாறுதல்களை துல்லியமாகப் பதிவு செய்தனர்.

                அதே வேளையில் ஆண்களுக்கு காதல் உணர்வைத் தோற்றுவிக்கும் டெஸ்ட்ரோஜன் ஹார்மோன் அவர்களது உடலில் எந்தளவு சுரக்கிறது என்பதையும் ஆய்வு செய்தனர்.

                ஆய்வின் முடிவில் கண்ணீர் வடிக்கும் பெண்களை ஆண்களுக்கு பிடிக்காது என்று முடிவுக்கு வந்துள்ளனர். அதைவிட முக்கியமானது அழுவதால் பெண்களின் அழகு குறையும் என்றும் தெரியவந்துள்ளதாக அறிவித்துள்ளனர்.

                ஸ்ருதி ஹாசனின் அழகான அழுகை திரையுலகில் மிகப் பிரபலமாக உள்ளதாமே... அப்படின்னா வர இருக்கும் அவரது கணவருக்கு அவரைப் பிடிக்க வேண்டுமே...நாயகன் அழுகையை ரசித்த மக்கள் இந்த நாயகி அழுகையை ரசிக்க விரும்பவில்லையோ...

                ஐயோடா சாமி... அழுதால் அழகும் குறையுமாமே....இந்த சீரியல் நடிகைகளின் கதி என்னாவது?

                “பொண்ணு சிரிச்ச முகமா அழகா இருக்கா” என்று பெயர் வாங்குவது எப்படி? “அவ சரியான அழுமூஞ்சி” என்று பெயர் வாங்குவது எப்படி? அழுதால் கணவனுக்குப் பிடிக்காது, அழுவதால் அழகு குறையும் இவற்றையெல்லாம் தாண்டி சிந்தித்தோமானால், பெண்களின் கண்ணீரே அவர்களுக்கு எதிரி. எவரிடம் தன்னம்பிக்கை இல்லையோ அவரே கண்ணிரை நம்புவார். 'அவர்கள்' திரைப்படத்தில் வரும் கதாநாயகி போல எந்தச் சூழலிலும் அழ மாட்டேன் என்று சபதம் எடுத்துக்கொள்வது தன்னம்பிக்கையை மட்டுமல்ல நம் மீதே நமக்கு ஒரு நல்லெண்ணம் வளரத் துணையாக இருக்கும். எப்போதும் அழுது எந்தக் காரியத்தையும் சாதிக்க எண்ணக் கூடாது.. அது நம்மிடம் உள்ள அச்சத்தையே காட்டும். பெண்களே கண்ணீர் சிந்துவது கண்களுக்கு நல்லது. ஆனால் அது ஆனந்தக் கண்ணீராக இருக்கட்டும். அழுகை கண்ணீராக இருக்க வேண்டாம். .இனியொரு விதி செய்வோம். எந்த நாளிலும் அழுவதை விடுப்போம்......

(இது மே 1-15, 2012 குமுதம் ஹெல்த் இதழில் இடம்பெற்ற என் கட்டுரை. நன்றி குமுதம் ஹெல்த்)

நரையே நரையே போ! போ!

 

     தசரத மகா மன்னன் கண்ணாடி முன்பு நின்று அலங்காரம் செய்து கொண்டிருந்தாராம். காதோரம் ஒரு வெள்ளி மயிர் இருப்பதைக் கண்டாராம். தனக்கு வயதாகிவிட்டது. இன்னும் ஒரு வாரிசு வரவில்லையே என்று அசுவமேத யாகம் செய்தார் என்பர். காதோர நரை நாற்பதைக் காட்டும் என்பார்கள். ஆனால் இன்று நகர வாசிகளிடம் தலையிலும் சரி விழியிலும் சரி எழுபது ஆனாலும் வெள்ளித்திரை விழுவதில்லை. அப்படிச் சொல்ல முடியாது. வெள்ளித் திரையை கருப்புத்திரை போட்டு மறைத்து விடுகின்றனர். ஆனால் இதற்கு ஆகும் செலவு சொல்லி முடியாது. பட்ஜட்டில் முதலிடம் ஹேர்டை எனப்படும் சாயத்திற்கே கொடுக்கக் கூடிய நாகரிக உலகமாக இன்று உள்ளது. என்ன செய்ய

ஆனால் இயற்கையிலேயே நரை,திரை, மூப்பு இன்றி இருந்தால் எப்படி இருக்கும்?கண்ணாடியைப் பார்த்து நாம் முகம் பார்க்கும் கண்ணாடியில் நரைமுடிகளை பார்த்தவுடனேயே வயதாகிவிட்ட உணர்வும்,சோர்வும் தோன்றிவிடுவதுண்டு.

முடிக்குச் சாயம் பூசத் துவங்கி விடுகிறோம். அமோனியா,காரியம் கலந்த சாயங்கள் பல கெடுதல்களை ஏற்படுத்துகின்றன. நரைமுடியை வேருடன் பிடுங்குவதால்,மெலனின் இல்லாத செல்கள்,அருகிலுள்ள முடிகளின் வேர்க்கால்களில் சிதறி,அங்கு பெருகி, மீண்டும் நரைமுடியை அதிகப்படுத்துகின்றன. இதனால் மேலும் மனச்சோர்வும் கவலையும் ஏற்படுகிறது. இவை மேலும் நரைமுடியை அதிகரிக்கவே செய்கிறது.

நரை ஏன் ஏற்படுகிறது மனித ரோமத்திலுள்ள மெலனின் என்னும் கரிய நிறப் பொருளானது ரோமத்திற்கு கறுப்பு நிறத்தைக் கொடுக்கிறது. இந்த மெலனின்,முடியின் வேர்க் கால்களில் குறையத் துவங்குவதால், கறுப்பு நிறமற்ற முடி முளைக்கத் துவங்குகிறது

மெலனினை உற்பத்தி செய்யும் செல்கள்,முடியின் அடியிலும், தோலிலும்,கறுப்பு நிறமிகளை சேமித்து வைக்கின்றன. இந்த செல்களின் உற்பத்தி குறைந்து, மெலனின் அற்ற செல்கள் வளர்வதால்,நரைமுடி தோன்ற ஆரம்பிக்கிறது.

யாருக்கு நரை வருகிறது. தைராய்டு குறைபாடு,பி12 வைட்டமின் குறைபாடு,வெண்படை போன்ற தோல் நோய்கள்,ஊட்டச்சத்து குறைபாடு, கட்டுப்பாடற்ற சர்க்கரை நோய் புகைப்பழக்கம்,புரதச்சத்து குறைபாடு, பரம்பரை ஆகியவை, நரை ஏற்படக் காரணங்களாக அமைகின்றன

தலையில் பொடுகு அதிகம் தோன்றினால், அவை வேர்க்கால்களை அடைத்து,மெலனின் உற்பத்தியை குறைத்து,நரையை அதிகப்படுத்துகின்றன என்றும் கூறப்படுகின்றன.

மேலும் தலையை அலசி குளிப்பதற்காக பயன்படுத்தும், சில வேதிப்பொருள் கலந்த வீரியமிக்க ஷாம்புகள் மற்றும் முடி அலசிகளிலுள்ள ஹைட்ரஜன் பெராக்சைடு,வேர்க் கால்களை சேதமடையச் செய்து,கறுப்பு நிறமிகளை அழித்து, நரைமுடிகளை அதிகப்படுத்துகின்றன. புரதச்சத்து மற்றும் இரும்புச்சத்து குறைவினால், முடியின் கறுமை நிறம் மங்கி,செம்பட்டை நிறம் தோன்றுகிறது. நாளடைவில் இதுவே,நரைமுடிக்கு காரணமாக அமைகிறது. நரைமுடி அதிகரிப்பதற்கு,பி.சி.எல்.,என்ற ஜீன்கள் காரணமாக இருப்பதாக,அறிவியல் ஆய்வுகள் தெரிவிக்கின்றன

மேலதிக தகவலாகக் சிவப்பழகர்கள் கோபித்துக்கொள்ளக் கூடாது. அச்சப்படவும் கூடாது. கரிய நிறமுடையவர்களை விட சிவந்த மற்றும் மாநிறமுடையவர்களுக்கு,வெள்ளை நிற முடி,விரைவில் ஏற்படுகிறது.

இந்தியர்களுக்கு,30 வயதுக்கு மேல்,நரைக்கத் துவங்குவதாக, ஆய்வுகள் தெரிவிக்கின்றன. ஆனால் இப்போது,20 வயதிற்கு முன்பாகவே, சிலருக்கு நரை துவங்கி விடுகிறது. இது இளநரை என்று அழைக்கப்படுகிறது. இது பற்றி அதிகம் கவலை கொள்ள வேண்டியதில்லை. காலப்போக்கில் சரியாகிவிடும். பொதுவாகப் பெண்களை விட ஆண்களுக்கே, முடி மிக கறுப்பாக காணப்படுகிறது. இதிலிருந்து பெண்களின் வெள்ளை மனம் போலவே வெள்ளை முடியும் விரைவாக வருகிறது என்பதையும் தெரிந்து கொள்ளலாம்.

நரைக்குக் காரணமான மெலனின் அழிவை தடுத்து,நரைமுடிகளை நெருங்க விடாமல் தடுக்கும் அற்புத மூலிகை கரும்பூலா. மயிர்க் கால்களில் தோன்றும் மெலனின் பற்றாக்குறையைக் கட்டுப்படுத்தி கருமுடியைக் காப்பாற்றுகிறது.

.

இந்தச் செடியின் இலைகள் மற்றும் பழங்களில் உள்ள குளோஜிடோனால்,பிட்டுலின் மற்றும் பிரிடெலின் வேதிப்பொருட்கள், நரைமுடிகளுக்கு காரணமான மெலனின் அழிவை தடுத்து,கறுப்பு நிறத்தைக் கூட்டி,இளநரை ஏற்படாமல் தடுக்கின்றன.

கரும்பூலா பழம் மற்றும் இலைகள், நெல்லிக்காய்,மருதோன்றி இலைகள்,கறிவேப்பிலை இலைகள்,அவுரி இலைகள் ஆகியவற்றை இடித்து, சாறெடுத்துக் கொள்ள வேண்டும். கடுக்காய் தோலை, ஒன்றிரண்டாக இடித்து வைத்துக் கொள்ள வேண்டும். 500 மி.லி., தேங்காய் எண்ணெயுடன் சாறு மற்றும் கடுக்காய் தோல் பொடியைக் கலந்து, கொதிக்க வைக்க வேண்டும். சாறு வற்றியதும் வடிகட்டி, சூடு ஆறியபின், மூடிய பாத்திரத்தில் எடுத்து வைத்து தலையில் தேய்த்து வர நரை காணாமல் போய்விடும் என்கின்றனர். அவ்வப்போது வடிகட்டி தலையில் தேய்க்க வெண்டும். விரைவில் நரைமுடி வராமல் தடுக்கும் மற்றும் இளநரை மாறும். முயற்சி செய்து பார்க்கலாமே. நரையைப் போக்கி இளமையாகத் தோன்றி மகிழ்வாக இருக்கலாமே.

நன்றி குமுதம் ஹெல்த்

உங்கள் மகனின் விடைத்தாளில் முட்டை மதிப்பெண்ணா..?

அம்மாக்களே இதைக் கொஞ்சம் படிங்க…….

பள்ளிகள் திறந்துவிட்டன. மாணவர்களுக்குப் பாடங்களும் தொடங்கிவிட்டன. கூடவே அம்மாக்களுக்குக் காய்ச்சலும் தொடங்கி விட்டன. மதிப்பெண் காய்ச்சல். பையன் எங்கே முட்டை வாங்கி வந்துவிடுவானோ என்னும் பயக்காய்ச்சல். அம்மாக்களே நீங்கள் அவனுக்கு முட்டைக் கொடுக்கவில்லை என்றால் அவன் என்ன செய்வான். அம்மா கொடுக்காத முட்டையை ஆசிரியரிடம் வாங்கிவிடுகிறான். ஆசிரியர் இரண்டாம் அம்மா என்பார்களே. அவன் கெட்டிக்காரன். அழகாக இரண்டாம் அம்மாவிடம் முட்டையை வாங்கிக்கொள்கிறான்.   பயப்படாதீர்கள் தாய்மார்களே.

தினமும் ஒரு முட்டை அவனுக்கு நீங்களே கொடுத்துவிட்டால் தேர்வில்   அவன் வாங்கும் முட்டைகள்  குறைந்து விடும் என்கின்றனர்.  இதன் மூலம் சொல்ல வருவதென்னவென்றால் தினமும் ஒரு முட்டை கொடுப்பதன் மூலம் மாணவர்களின் கற்கும் திறனை அதிகரிக்கலாம்  என்கின்றனர்.  இது எப்படி அறிவுத்திறனை வளர்க்கிறது என்பதை அறியும் முன்பு சாதாரனமாக ஒரு முட்டையில் என்னென்ன சத்துகள் உள்ளன என்று பார்ப்போம்.

          முட்டைகளைப் பொருத்து கலோரிகளின் அளவு கூடும் அல்லது குறையும் என்றாலும் சுமார் ரக ஒரு முட்டையின் வெள்ளைக்கருவில் 17 கலோரியும், மஞ்சள் கருவில் 59 கலோரியும் உள்ளது. உடலுக்குத் தேவையான அனைத்து வகையான ஊட்டச் சத்துக்களும் முட்டையில் உள்ளன. முக்கியமாக முட்டையில் தேவையான அளவு கொழுப்பு மற்றும் புரதச்சத்து நிறைந்துள்ளது.

          முட்டையில் தைராய்டு ஹார்மோன் சுரப்பதற்குத் தேவையான அயோடின் உள்ளது. பற்கள் மற்றும் எலும்புகளுக்குத் தேவையான பாஸ்பரஸ் உள்ளது. காயங்களை குணமாக்கும் மற்றும் நோய் எதிர்ப்பு சக்திக்குத் தேவையான துத்தநாகம் அதிகம் காணப் படுகிறது

          முட்டையில் கெட்ட கொலாஸ்டிராலுடன் நல்ல கொலஸ்ட்ரால் அளவும், டிரைகிளி செர்டைஸின் அளவும் இதே அளவு சக்தி வாய்ந்த தரத்துடன் இருக்கின்றன. எனவே, கெட்ட கொலஸ்ட்ரால் இரத்தத்தில் சேராது.

          இத்துடன் இதயத்திற்குப் பாதுகாப்பான ஃபோலிக் அமிலம் மற்றும் பி குரூப் வைட்டமின்களும், நச்சு முறிவு மருந்துகளும், கொழுப்புச் செறிவில்லாத கொழுப்புகளும் முட்டையில் உள்ளன

          நம்ம நாட்டுல சத்துணவு மையத்தில் முட்டை வைத்துள்ளோம். அமெரிக்காவில் முட்டைக்காகவே சத்துணவு மையம் வைத்துள்ளார்கள். தினமும் குழந்தைகளுக்கு ஒருமுட்டை கொடுப்பதன் மூலம் அவர்களின் கற்கும் திறன் அதிகரிக்கிறது என்கின்றன முட்டைச் சத்துணவு மையத்தின் ஆய்வுகள். காலை உணவுடன் முட்டை வழங்குவதால் கவனிக்கும் தன்மை அதிகரிப்பதாகவும்,வாசிப்புத் திறன் கூடும் என்றும் ஆராய்ச்சியில் தெரியவந்துள்ளது.

          குழந்தைகளின் எடையை சீராக வைத்திருக்கும். எடைக்குறைவான குழந்தைகளுக்கு தினமும் ஒரு முட்டை கொடுப்பதன் மூலம் சத்துக்கள் கூடுவதோடு உடல் எடை அதிகரிக்கும்.

          வளரும் குழந்தைகளுக்கு மூளை வளர்ச்சி மிகவும் அவசியம். தினம் ஒரு முட்டை சாப்பிடுவதன் மூலம் குழந்தைகளின் மூளை வளர்ச்சி அதிகரிக்கும். முட்டையின் மஞ்சள் கருவில் உள்ள ஆண்டி ஆக்சிடென்டல் கண்பார்வையைத் தெளிவாக்கும்.

          குழந்தை பருவத்தில் இருந்தே தினமும் ஒரு முட்டை சாப்பிடுவதன் மூலம் வயதான பின்பு ஏற்படக்கூடிய கார்ட்க்ராக்ட் பிரச்சினையில் இருந்து தப்பலாம். முட்டையில் உள்ள வைட்டமின் டி உயிர்ச் சத்து எலும்புவளர்ச்சிக்கு உதவுகிறது.

          நோய் எதிர்ப்பு சக்தி அதிகரிக்கிறது. இதயக் கோளாறு மற்றும் பக்கவாத நோய் பாதிப்பில் இருந்து பாதுகாக்கிறது. தலைமுடி வளர்ச்சி மற்றும் தோல் பளபளப்பிற்கு முட்டை சிறந்த பங்காற்றுகிறது.

குழந்தைகளுக்கு மட்டுமல்ல. பெரியோர்களுக்கும் முட்டை ஆரோக்கிய உணவு என்கிறது ஆய்வு. வாரத்திற்கு ஆறு முட்டை உட்கொள்ளும் பெண்களுக்கு மார்பக புற்றுநோய் ஏற்படுவது 44 சதவிகிதம் குறைவதாக ஆராய்ச்சியில் தெரியவந்துள்ளது.

அமெரிக்காவின் முட்டை சத்துணவு மையமும், ஹார்வார்டு ஸ்கூல் ஆஃப் பப்ளிக் ஹெல்த்தும் கடந்த 14 ஆண்டுகளாக முட்டை உணவு பற்றி ஆராய்ந்தன. 14 ஆண்டுகள் தினமும் முட்டை சாப்பிடும் பல ஆயிரம் பேர்களைத் தொடர்ந்து கண்காணித்தார்கள்.

இவர்கள் உடலில் இதய நோய்க்கான அறிகுறியே இல்லை என்பது தெரியவந்தது. சத்துணவான முட்டையில் உள்ள பொருட்கள் இதய நோயைக் குணப்படுத்துகிறது. அதிக அளவு கொலஸ்ட்ரால் இல்லாமல் பார்த்துக் கொள்கிறது. இதனால், முட்டை சாப்பிட்டவர்களுக்கு கொலஸ்ட்ரால் அதிகரிக்கவில்லை. எனவே, இதயநோய் அபாயமும் இல்லை.

முட்டையில் கொலஸ்ட்ரால் இருப்பது உண்மை. ஆனால், அதை அளவுடன் சாப்பிட்டால், இதயத்திற்கு எந்தவிதமான கெடுதலையும் செய்யாது என்கிறது ஹார்வார்டு பள்ளி. சரிவிகித உணவு சத்துணவுத் திட்டம் தயாரித்து அதன்படி சாப்பிடுகிறவர்கள் தினமும் முட்டையை ஒதுக்கவேண்டாம் என்றும் கூறுகிறது.

1976ஆம் ஆண்டு முதல் பதினோரு அமெரிக்க மாநிலங்களில் தினமும் முட்டை சாப்பிட்டு வந்த நர்சுகளின் உடல்நிலை கவனிக்கப்பட்டு குறிப்புகள் சேர்க்கப்பட்டன. இது 2 வருட ஆய்வு. இது போக, 1986 ஆம் ஆண்டு முதல் அமெரிக்க பல் மருத்துவர்கள், கண் மருத்துவர்கள், கால்நடை மருத்துவர்கள் ஆகியோர் தினமும் முட்டை சாப்பிட்டனர்.

அவர்களிடம் இரண்டு வாரத்திற்கு ஒரு முறை கேள்வி கேட்கப்பட்டது. அந்த மருத்துவர்களின் கொலஸ்ட்ரால் அளவு, கடந்த 12 ஆண்டுகளில் அதிகரிக்கவில்லை. ஸ்டிரோக் அபாயமும் ஏற்படவில்லை.

80 ஆயிரம் நர்சுகளின் உடல் நலம் பற்றிய 14 ஆண்டு கால மருத்துவக் குறிப்பேடுகள், 37 ஆயிரம் ஆண்களின் உடல் நலக்கோளாறு பற்றிய எட்டு வருட மருத்துவக் குறிப்பேடுகள் தினமும் ஒரு முட்டை சாப்பிடலாம். அதுவும் பயமில்லாமல் சாப்பிடலாம் என்று உறுதியாகத் தெரிவித்தது.

சாதாரண அவித்த முட்டையில்தான் இவ்வளவு நன்மைகள். ஒரு நாளைக்கு 300 மில்லி கிராம் அளவுதான் கொலஸ்ட்ரால் நம் உணவில் சேரலாம். ஒரு முட்டையில் 213 மில்லிகிராம் கொலஸ்ட்ரால் இருக்கிறது. இதுவே இதயத்துக்கு நலம் பயக்கும். 

சொல்றாங்களே என்று நீரழிவு நோயாளிகள் தினமும் முட்டை சாப்பிட்டு விடக்கூடாது. இது அவர்களுக்கு கெடுதல் உண்டாக்கும். அவர்கள் மருத்துவர்களின் ஆலோசனையின்படி வாரம் ஒரிரு முட்டை மட்டுமே சாப்பிடலாம். வடை போச்சே….

சரி.. தொடங்கிய இடத்திற்கு வருகிறேன். என் அனுபவமும். எனக்குத் தெரிந்த ஒரு மாணவி தினமும் காலையில் இரண்டு முட்டை சாப்பிடுவேன் என்பாள். அவள் விளையாட்டு வீராங்கனை என்றுதான் அந்தப் பள்ளி அவளது பெற்றோரும் எல்லாரும் நினைத்தனர். ஆனால் பனிரெண்டாம் வகுப்பு தேர்வு மதிப்பெண் வந்ததும்தான் அவள் முட்டையின் ரகசியம் தெரிந்தது. படிப்பிலும் அவளே முதலிடம் என்பது. சத்தியங்க… நம்புங்க….

இதையெல்லாம் அறியாமலா சத்துணவு திட்டத்தில்  குழந்தைகளுக்கு வாரத்திற்கு ஒரு முட்டை என்று இருந்ததை வாரம் முழுவதும் முட்டை என்று அறிவித்தாங்க… .. தராங்களான்னு கேக்கக்கூடாது.. ஹி ஹி ஹி.. இதுக்கு மேல நான் ஒன்னும் சொல்ல மாட்டேன்…..வரட்டா…. ஜூட்…..

நன்றி குமுதம் ஹெல்த்

கண்ணுக்குள்ள கெழுத்தி

காண்டக்ட் லென்ஸ் ஜாக்கிரதை…….

(கண்ணுக்குள்ளே கண் ஆடி}

கண்ணுக்குள்ள கெழுத்தி வெச்சிருக்கா ஒருத்தி என்னும் பாடலைக் கேட்கும் போதெல்லாம் கண்களுக்குள் ஆடியைப் (லென்ஸை} பொருத்திக் கொண்டிருப்பவர்கள் நினைவுதான் வரும். இரண்டு வயது ஆனவுடனே கண்ணாடி போடும் பாரம்பரியமாக இந்திய பாரம்பரியம் போனது என்பது இந்தியர்களுக்கு ஏற்பட்ட சோதனை என்றே கூற வேண்டும். ஆரோக்கியமான உணவு சாப்பிடாததால் பார்வை குறைபாடு நிறைய பேருக்கு இருக்கிறது என்கின்றனர். ஆனால் தொலைக்காட்சி, கணினி பயன்பாடு ஆகியவையும் இதற்குக் காரணம் என்றால் அது மிகையல்ல. வேறு வழியின்றி இளம் வயதிலேயே கண்ணாடி போட ஆரம்பித்து விடுகின்றனர். இந்த கண்ணாடி போடும் முறையும் பதினைந்து வயது வரைதான் என்ற நிலையில் நம் நாகரிக உலகம் சென்று விட்டது. அதற்கு மேல் காண்டக்ட் லென்ஸ் கட்டாயம் என்ற அளவில் சென்று விட்டோம். ஏனெனில் கண்ணாடி முக அழகைக் குறைக்கிறது என்பதால்.

சரி காண்டக் லென்ஸ் போடட்டும். காலத்திற்கு ஏற்ப நாமும் மாறித்தானே ஆகவேண்டும். இல்லாவிட்டால் சோடா புட்டி என்று அழைப்பதைத் தவிர்க்க முடியாது. மேலும் கண்ணாடி போடுவதால் மூக்கில் ஏற்படும் தழும்புக்கும் விடை கொடுக்கலாம்.

அதைப் போடுகிறவர்கள் எவ்வளவு கவனமாக இருக்க வேண்டும் என்பதை இங்கு பார்க்கலாம்.

கான்டாக்ட் லென்ஸ் போடுறங்களுக்கு கண் எரிச்சல், கண் சிவப்பு நிறத்தில் மாறுதல், இதுலாம் எதுக்கு வருது? ஏன்னா அவங்க அதை போடும் போது முறையா எதையும் ஃபாலோ பன்றது இல்ல. இதுனால அவங்க கண் தான் பாதிக்கப்படும். ஏனென்றால் கண் ரொம்ப சென்ஸிடிவ், அதை நாம தான் பத்திரமா பாத்துக்கணும். கான்டாக்ட் லென்ஸயும், அதை போடும் போதும் என்னென்ன ஃபாலோ பண்ணணும்-னு பாக்கலாமா!!!

1. கான்டாக்ட் லென்ஸ் எப்படி போட வேண்டும் என்று கொடுத்திருக்கிற அறிவுரைகளை நன்றாகப் படித்து அதனைப் பின்பற்றுவது மிக மிக முக்கியம்

2.. கான்டாக்ட் லென்ஸ் போடும் முன் கைகளை நன்கு கழுவ வேண்டும். கழுவியதும் கையை ஒரு சுத்தமான துணியால் துடைத்துப் பிறகு தான் லென்ஸ் போட வேண்டும்.

3. மிகவும் முக்கியமான ஒன்று, லென்ஸ் போடும் முன்னும், போட்டு எடுத்து வைக்கும் முன்னும் அதை கொடுத்திருக்கும் மருந்தால் மறக்காமல் கழுவ வேண்டும். இந்த மருந்து லென்ஸில் பாக்டீரியா இருந்தால் அழித்து விடும். மேலும் கண்களில் எந்த ஒரு நோயும் வராது.

4. லென்ஸை கண்ட இடங்களில் வைக்காமல், அதற்குரிய பெட்டியில் வைக்க வேண்டும். மேலும் அந்த பெட்டியை அடிக்கடி சுத்தம் செய்ய வேண்டும்.

5. லென்ஸை கழுவும் மருந்தின் உபயோகிக்கும் கால அளவை மறக்காமல் கவனிக்க வேண்டும். ஏனென்றால் மருந்தின் தேதி முடிந்தும் உபயோகித்தால் அது கண்களையே பாதிக்கும். ஆகவே அதன் தேதியைக் கவனிப்பது மிகவும் முக்கியம்.

6. கான்டாக்ட் லென்ஸை கழுவுவதற்கான மருந்துகள் பல உள்ளன. இதில் சரியான ஒன்றை தேர்வு செய்து வாங்கி பயன் படுத்த வேண்டும். ஏனெனில் நூற்றுக்கு இருபது விழுக்காட்டினர்க்கு சில மருந்துகளால் அலர்ஜி ஏற்படுகிறது என்கிறது ஆய்வு.

7. குளிக்கும் போதும், நீச்சல் அடிக்கும் போதும் கண்டிபாக கான்டாக்ட் லென்ஸைக் கழட்டி வைத்து விட வேண்டும்.

8. முக ஒப்பனை செய்யும் முன் முக்கியமாக கண் மையும் பவுடரும் கான்டாக்ட் லென்ஸை போட்டு தான் போட வேண்டும். ஏனெனில் அப்போதுதான் மேக்கப் போட கண் சரியாகத் தெரியும் என்பது ஒருபுறம். மேலும் ஒப்பனை போட்டபின் லென்ஸைப் பொருத்தினால் சில நேரங்களில் கண்ணீர் வரும், கண் கலங்கும். போட்ட முகப்பவுடர் கலைய வாய்ப்பாகி விடும்.

9. ஒப்பனை செய்த பின்பு கைகளை நன்கு சோப்பு போட்டு கழுவிட்டு, கழுவிய கைகளைச் சுத்தமான துணியால் துடைத்த பின்பே கான்டாக்ட் லென்ஸை தொடவோ கண்களில் பொருத்தவோ செய்ய வேண்டும்.

10. கான்டாக்ட் லென்ஸை போட்டு வெளியில் செல்லும் போகும் போது சூரியனிலிருந்து வரும் புற ஊதாக்கதிர் நேரடியாகக் கண்ணில் படாமல் பாது காக்க வேண்டியதும் மிக முக்கியமானது. கண்ணுக்கு சன்கிளாஸ் அல்லது தொப்பி போட்டு போக வேண்டும்.

11. சில லென்ஸ் ஒவ்வொரு நாளும் மாற்றக்கூடியதாக இருக்கும். சில ஒரு வாரம் பயன் படுத்துவதாக இருக்கும். சில மூன்று மாதம் முதல் ஓராண்டு வரை போடும் படியாக இருக்கும். அவற்றின் கால எல்லை அறிந்து அதன் பின் பயன் படுத்துவதைத் தவிர்க்க வேண்டும். RGB லென்ஸ்கள் ஒராண்டு பயன் படுத்தும் வகையில் அமைந்திருப்பன.

12. சற்றேறக்குறைய பனிரெண்டு மணி நேரத்திற்கு மேல் லென்ஸைப் பயன்படுத்துவதைக் குறைப்பது கண்களுக்கு நல்லது.

13. இரவு படுக்கும் முன்பு லென்ஸை கழற்றி வைத்து விட வேண்டும். தொடர்ந்து லென்ஸ் அணிவதால் கண்களுக்கு தேவையான ஆக்ஸிஜன் செல்வதற்கு அது தடையாக இருக்கும்.

14. எப்போதாவது லென்ஸை கழற்றுவதிலோ அல்லது பொறுத்துவதிலோ சிரமம் ஏற்பட்டால் உடனடியாக யார் தொடர்ந்து சிகிச்சையும் அறிவுரையும் கொடுக்கிறார்களோ அந்த லென்ஸ் பொருத்துநரை அனுகுதல் நல்லது.

15. சில நேரங்களில் கண் எரிச்சல், கண் சிவத்தல், பார்வையில் பிரச்சனை போன்றவை ஏற்படுவது உண்டு. இவை பெரும்பாலும் கவனமின்மையால் ஏற்படுவது. அதாவது லென்ஸை சரியாக லோஷனில் போட்டு கழுவாமல் விடுவது, சரியாகப் பொருத்தாமல் விடுவது, லென்ஸில் போதிய கவனமின்மை போன்றவற்றால் ஏற்படுகிறது. இந்த கண் எரிச்சல், சிவத்தல் முதலியவை கண் அல்சர், அலர்ஜி ஆகியவற்றுக்கு ஒரு அடையாளமாகும்.

16. கண் எரிச்சல், கண் சிவத்தல் முதலியவை ஏற்படும் நேரங்களில் கண்டிப்பாக ஆடி பொருத்துநரைப் பார்ப்பதைத் தவிர்த்து சிகிச்சை அளித்த கண் மருத்துவரைப் பார்க்க வேண்டியது மிகவும் அவசியம்.

அப்பாடா இன்னும் சொல்லிக்கொண்டே போகலாம் போல இருக்கிறதே. அழகுக்கு அழகு குறையாமல் இருக்கப் பொருத்தும் ஆடியில் இருக்கும் பிரச்சனைகளைச் சரியாகப் புரிந்து கொண்டல் பிரச்சனையே இல்லை. காட்டலாம் சோடா புட்டிக்கு டா டா. கொடுக்கலாம் கண்களை லென்ஸுக்கு…..

நன்றி குமுதம் ஹெல்த்

எண்ணெயில் கொப்பளிப்பதா…..

     
 சென்னையில் இலக்கிய விழாக்களுக்குச் சென்றால் கை நிறைய ஆயில் புல்லிங் ஆயில் பாக்கெட்டுகளை வாங்கிக்கொண்டு வரலாம். இவற்றை இவர்கள் விளம்பரத்திற்காகத் தருகிறார்களா இல்லை விறபனை ஆகவில்லை என்பதற்காகத் தருகிறார்களா என்று புரியவில்லை. ஆனால் குறைந்தது இருபது முப்பது பாக்கெட்கள் கிடைக்கிறது என்பது உண்மை.

      வயிறு சோற்றுக்கு அழுகுது, குடுமி பூவுக்கு அழுகுது என்று பழமொழி கூறுவார்கள். அது போல இங்கு ரேஷன் கடையில் கியூவில் நின்று ஒரு லிட்டர் எண்ணெய் வாங்கி ஒரு மாதம் முழுவதும் பயன் படுத்தும் என்பத்தைந்து விழுக்காட்டு மக்கள் வாழ்கின்ற நம் நாட்டில் நாட்டில் இது சாத்தியமாகுமா. இருந்தாலும் ஐந்து நட்சத்திர விடுதிகளை நினைத்துக் கூட பார்க்க முடியாதவர்கள் அதைப்பற்றித் தெரிந்து கொள்வது இல்லையா அது போலத்தான் இதுவும்.

எண்ணெய் தேய்த்துக் குளித்தல் உடலுக்கு எவ்வளவு  தேவையோ அவ்வளவு தேவையானது ஆயில் புல்லிங் (Oil Pulling Therapy OPT} என்று சொல்லப்படும் எண்ணெய் கொப்பளித்தலும்.

முதலில் ஆயில் புல்லிங் என்றால் என்ன என்பதை அறிந்து கொள்ள வேண்டும். நல்லெண்ணெயை (Sesame seed Oil= Til Oil} வாயில் ஊற்றிக்கொண்டு கொப்பளிப்பதே ஆயில் புல்லிங் ஆகும். 

 தூய்மையான நல்லெண்ணெய் இரண்டு தேக்கரண்டி அளவு காலையில் வெறும் வயிற்றில் வாயில் ஊற்றி வாயின் எல்லா பகுதிகளுக்கும் செல்கிற மாதிரி குறைந்தது இருபது இருபத்தைந்து நிமிடங்கள் தொடர்ந்து கொப்பளித்து கொண்டே இருக்க வேண்டும்.இந்த எண்ணெய் வெண்மை நிறம் வருகிற வரையில் கொப்பளிக்க வேண்டும் மஞ்சளாக இருக்க கூடாது அதாவது நாம் கூறும் இந்த இருபது அல்லது இருபத்தைந்து நிமிடங்கள் கொப்பளித்தால் நாம் கூறும் வெண்மை நிறத்தை நமது உமிழ்நீர் ஆக்கிவிடும். வெண்மை நிறம் வந்தததும் உமிழ்ந்து விட்டு வாயை நன்குதண்ணீர் கொண்டு தூய்மை செய்து கொண்டு பின்னர் பல் துலக்கலாம். இந்த செயல் செய்யும் பொது நமது தொண்டைக்குழியில் தங்கி இருக்கும் அழுக்கு களும் தேவையில்லாத நஞ்சு களும் வெளியேறுவதாக ஆய்வில் தெரிவிக்கின்றனர். 

முக்கியமாகக் கவனிக்க வேண்டியது எண்ணெய் கொப்பளித்து முடித்து வாஷ் பேசினில் உமிழ்ந்து விட்டு வாஷ் பேசினை நன்கு கழுவி விட வேண்டும். இல்லாவிட்டால் எண்ணெய் பிசுபிசுப்பும் அதனால் தொற்றும் ஏற்பட வாய்ப்பு உண்டு. அல்லது மணல் நிரம்பிய குப்பைத்தொட்டியில் உமிழலாம். அதனையும் அவ்வப்போது மாற்றுவது அவசியம். அதுவும் முடியாத வேளையில் பிளாஸ்டிக் கவர்களில் உமிழ்ந்து அதனை எறிவது சுலபமான முறை. கண்டிப்பாக உமிழும் போது கண்டிப்பாக நடைபாதையிலோ அல்லது தோட்டத்தில் செடிகளின் அருகிலோ உமிழக்கூடாது.

 எண்ணெயை கொப்பளிக்க முடிந்த எவரும், எந்த வயதினரும் இதனை செய்யலாம். இதற்கு எந்த வித பத்தியமோ உணவுக் கட்டுப்பாடோ கிடையாது. ஏதாவது நோய்க்காக மாத்திரைகளை உட்கொள்பவராக இருந்தாலும் கவலை இல்லை. நீங்கள் அந்த மாத்திரைகளை தொடர்ந்து உட்கொள்ளலாம். நோயின் தன்மை குறைந்தால், மருந்தின் அளவையும் மருத்துவரின் ஆலோசனையோடு குறைத்துக் கொள்ளலாம்.

ஆயில் புல்லிங் செய்யும் போது ஒவ்வாமையால் இருமல் ஏற்பட்டால், உடனே வேறு நிறுவனத்தின் எண்ணெய்க்கு மாற்றிவிடலாம். இதைச் செய்யும் பொழுது தவறுதலாக அதனை விழுங்கி விட்டாலும் பயப்பட வேண்டாம். வயிற்றுப்போக்கு அல்லது வாந்தி தவிர வேறொன்றும் நேராது! விரைவில் நிவாரணம் வேண்டுவோர், நாளொன்றுக்கு மூன்று முறை செய்யலாம். ஆனால், வெற்று வயிற்றுடன் தான் இதைச் செய்ய வேண்டுமென்பது விதி.

இந்த மருத்துவத்தை செய்ய ஆரம்பித்ததும், சிலருக்கு, நோயின் தன்மை சற்று அதிகரித்து பின்னர் குறைகிறது. இது, நெடுநாளாய் வாட்டும் நோய் குணமாகப் போகிறது என்பதின் அறிகுறி. இந்த எளிய வைத்திய முறையை பின் பற்றுவதோடு, தூய காற்றை சுவாசித்து, நிறைய நீர் பருகி, அளவான சுகாதாரமான உணவுகளை உட்கொண்டு நல்ல முறையில் உடற்பயிற்சி செய்து வந்தால், நம் முன்னோர்கள் போன்று நோயற்ற வாழ்வு வாழலாம்.

ஆனால் இந்த எண்ணெய் மருத்துவம் நம் சமுதாயத்தி பன்னெடுங்காலமாக இருந்து வந்துள்ளது என்பதற்குச் சான்றுகள் பல உள்ளன., நல்லெண்ணெயை வாயில் போட்டுக் கொப்பளிப்பது, காலையில் பழைய சோற்றுத் நீரில் நல்லெண்ணெயை விட்டு குடிப்பது இவையெல்லாம் பண்டைய முறை. பல ஆயிரம் ஆண்டுகளுக்கு முன்பாக தோன்றிய சாரகா (CHARAKA} என்னும் ஆயுர்வேத மருத்துவ நூலில் நல்லெண்ணெயை வாயில் ஊற்றிக் கொப்பளிக்கும் இம்மருத்துவம் பற்றி தெளிவாகக் குறிப்பிடப்பட்டுள்ளது இப்போது இம்மருத்துவம் ஆயில் புல்லிங் என்னும் பெயரில் மிகப் பிரபலமாகப் பேசப்பட்டும் பேணப்பட்டும் வருகிறது. 

இதன் பயன் பல்வகையான நுண்ணுயிரிகளுக்கும், கிருமிகளுக்கும் நமது வாய்தான் நாற்றங்காலாகி நமக்கு தீமை செய்கிறது. இந்த எண்ணெய் கொப்பளிப்பு, அத்தகைய தீய, கொடிய கிருமிகளையும் நுண்ணுயிரிகளையும் அழித்து அதன் மூலமாக உடலில் நஞ்சு கலந்த வேதியியல் பொருட்களை வெளியேற்றுகிறது. இதனால் நமது உடலில் உள்ள ஒவ்வொரு அணுக்களும் புத்துணர்வு பெறுகிறது. ஆயில் புல்லிங் மூலம் கழுத்துவலி, உடல் வலி, அலர்ஜி, ஆஸ்துமா, தோல்நோய், அரிப்பு, கரும்படை இதயநோய், சர்க்கரை நோய், ரத்த அழுத்தம்,நரம்பு தொடர்பான  நோய்கள் குணமடைவதாகக் கூறுகின்றனர். இந்த ஆயில் புல்லிங் எனப்படும் எண்ணெய் கொப்பளிப்பை நாம் முறையாக பழகி நாளும் செய்து வந்தால் பல்வேறு நோயில் இருந்து விடுபடலாம் என உறுதியாக கூறலாம். 

நல்ல உறக்கம் உண்டாகிறது. பற்கள் வெண்மை நிறம் அடைகிறது. வாய் புண் நீங்குகிறது. வாயு தொந்தரவு நீங்குகிறது. தசை நோய்கள் விலகுகிறது மார்பு நோய் நீங்கு கிறது. முதுகு வலி பல் நோய்கள் விலகுகிறது காதுநோய்கள் விலகுகிறது, கண் நோய்கள் விலகுகிறது கழுத்து பிடிப்பு நோய்கள் விலகுகிறது மூல நோய்கள் விலகுகிறது சிறுநீரகம் தொடர்பான சிக்கல் கள் நீங்குகிறது . பக்கவாத நோய் விலகுகிறது. வலிப்பு நோய்கள் விலகுகிறது புற்று நோய் கட்டிகள், மாதவிடாய் ஒழுங்கு இல்லாமை நோய்கள் விலகுகிறது. 

நம் உடலில் ஏற்படக்கூடிய இரத்த அழுத்தம், இதய நோய், பார்க்கின்சன் நோய்கள் கல்லீரல், நுரையீரல் நோய்,  புற்று நோய்,  பக்க வாதம், நரம்பு சம்பந்தமான நோய்கள், வெரிகோஸ் வெயின்ஸ், வலிப்பு, மாதவிடாய் தொல்லைகள், மார்பக நோய்கள், கருப்பை தொடர்பான நோய்கள், முகப்பருக்கள், படை போன்ற  எண்ணிலடங்கா நோய்களுக்கும் தொல்லைகளுக்கும் மிக எளிமையான மருத்துவக் கோட்பாடு ஒன்றினை மனித குலத்துக்கு தந்துள்ளனர் நம் முன்னோர்கள்.

இதனை சோவியத் ஒன்றியத்தைச் சேர்ந்த அறிஞர், டாக்டர் கராஷ் (Dr. KARACH}  என்பவர் அறிவியல் முறைப்படி ஆய்வு நடத்தி மெய்ப்பித்துக் காட்டியுள்ளார்.

அப்பரம் என்ன நமக்குத்தான் வடிவேலு சொல்லுவது போல நம்ம ஆளுங்க எவ்வளவுதான் சொன்னாலும் வெளிநாட்டார் சொன்னால் வேதவாக்கு ஆயிற்றேன். செய்வோம் ஆயில் புல்லிங்க்……